Konferenca e investitorëve amerikanë në Prishtinë fokusohet te investimet
Në Prishtinë po mbahet për tri ditë konferenca e investitorëve amerikanë, e cila synon të tërheqë kapital të huaj dhe të mbështesë projektet infrastrukturore.
Në Prishtinë po zhvillohet konferenca e investitorëve amerikanë, e cila shihet si mundësi për të nxitur investime të huaja dhe për të përshpejtuar projektet në kryeqytet. Në diskutime është përmendur edhe organizimi i Lojërave Mesdhetare 2030, si një prej arsyeve që kërkon më shumë zhvillim të infrastrukturës.
Gjenerali Wesley Clark, në një mesazh me video, tha se është krenar për popullin e Kosovës dhe për rrugën që ka kaluar vendi. Ai theksoi se investimet e huaja direkte janë burim i rëndësishëm për zhvillimin ekonomik dhe përmendi potencialin që Kosova ka në energji, bujqësi, turizëm malor dhe infrastrukturë.
Clark u ndal edhe te roli i qeverisë, duke thënë se institucionet duhet të krijojnë një mjedis të favorshëm për investitorët dhe të mbështesin partneritetet publiko-private. Sipas tij, fusha si furnizimi me energji, ujësjellësi dhe rezilienca infrastrukturore paraqesin mundësi për investime.
Kryetari i Prishtinës, Përparim Rama, tha se kryeqyteti po rritet me ritëm të shpejtë dhe se ofron kushte të favorshme për bizneset, përfshirë forcën punëtore të re, kostot e ulëta operative dhe normën prej 10 për qind të tatimit mbi fitimin. Ai përmendi edhe pozitën gjeografike të qytetit dhe rritjen ekonomike vjetore prej rreth 4 për qind.
E ngarkuara me Punë e SHBA-së në Kosovë, Anu Prattipati, tha se Prishtina është motori ekonomik i vendit dhe gjeneron më shumë se 40 për qind të GDP-së së Kosovës. Ajo veçoi klimën fiskale, përfshirë tatimin prej 10 për qind për korporatat, tatimin 0 për qind mbi dividendën dhe heqjen e tarifës 10 për qind për mallrat me origjinë nga SHBA, si dhe theksoi se Lojërat Mesdhetare 2030 hapin mundësi për investime në infrastrukturë.