Hapet programi për startup-et nga Kosova dhe Maqedonia e Veriut
Startup Wise Guys ka hapur aplikimet për programin 14-ditor “Western Balkan Accelerator” për startup-et B2B nga Kosova dhe Maqedonia e Veriut.
Programi do të zhvillohet në format hibrid, me sesione online dhe aktivitete fizike në Prishtinë dhe Shkup. Ai përfshin bootcamps, mentorim ndërkombëtar dhe mundësi për investim fillestar deri në 50 mijë euro, me potencial për financim shtesë deri në 250 mijë euro.
Iniciativa realizohet me mbështetjen e European Bank for Reconstruction and Development dhe Swiss EP, në bashkëpunim me partnerë lokalë si STIKK, Makerspace Innovation Center Prizren dhe Zephyr Angels.
Programi u dedikohet startup-eve në fazë të hershme që kanë kaluar fazën e idesë, kanë një produkt minimal funksional dhe kanë shenja të para të hyrjes në treg. Fokusi kryesor do të jetë te sektorët SaaS, inteligjenca artificiale, siguria kibernetike, fintech dhe zgjidhjet digjitale B2B.
Sipas organizatorëve, pjesëmarrësit do të kenë qasje edhe në rrjet mentorësh, investitorësh dhe ekspertësh të industrisë. Programi synon t’i mbështesë në zhvillimin e produktit, strategjitë e shitjes, mbledhjen e kapitalit dhe përgatitjen ligjore.
Afati për aplikim është deri më 18 maj. Startup-et e përzgjedhura do të prezantojnë idetë e tyre para investitorëve dhe do të krijojnë lidhje të reja në ekosistemin rajonal dhe ndërkombëtar.