Banka Botërore: Rritja e Kosovës kufizohet nga mungesa e fuqisë punëtore
Banka Botërore parashikon rritje të ngadaltë të ekonomisë së Kosovës në vitet 2026–2027, me ndikim të mungesës së fuqisë punëtore.
Në raportin më të fundit për Ballkanin Perëndimor, Banka Botërore vlerëson se ekonomia e Kosovës do të vazhdojë me ritëm të moderuar rritjeje gjatë viteve 2026–2027. Sipas raportit, rritja reale e PBB-së pritet të jetë 3.7% në vitin 2026 dhe 3.9% në vitin 2027.
Institucioni financiar thekson se perspektiva ekonomike e rajonit, përfshirë Kosovën, mbetet e ndikuar nga pasiguritë globale, konfliktet dhe presionet inflacioniste. Në përmbledhjen për Kosovën thuhet se ekonomia u ngadalësua në vitin 2025, por ruajti qëndrueshmëri në kushte pasigurie të shtuar.
Një nga sfidat kryesore të përmendura në raport është mungesa e fuqisë punëtore dhe pjesëmarrja e ulët në tregun e punës. Banka Botërore thekson se mungesat në këtë treg dhe emigrimi i vazhdueshëm i të rinjve po kufizojnë potencialin afatgjatë të rritjes ekonomike në Kosovë.
Në analizën rajonale, raporti vë në pah se pjesëmarrja më e madhe e grave dhe të rinjve në tregun e punës mund të sjellë përfitime të rëndësishme ekonomike. Drejtoresha e Bankës Botërore për Ballkanin Perëndimor, Xiaoqing Yu, tha se rajoni ka një rezervë të madhe talenti të pashfrytëzuar, por që përballet me pengesa për t’u përfshirë në ekonomi.
Banka Botërore rekomandon që Kosova të fokusohet në krijimin e vendeve të punës, përmirësimin e kushteve të punës dhe lehtësimin e pjesëmarrjes së grave dhe të rinjve përmes shërbimeve sociale dhe trajnimeve profesionale.